معجزه تعزيه كبيره

يوم الاربعاء اللى فات الموافق 5/5/2010 رجعت من الشغل ودخلت انام شويه لكن باب البيت خبط واحدى جاراتى قالت لابنى ابانوب فين ماما قلها نامت قلتله صحيها بسرعه وقلها طنط عوزاكى قلت له قلها ماما تعبانه ونايمه وبعد شويه لما تقوم تبقى تكلمك قالت له لا قلها تصحى ولما ابانوب جه يكلمنى تانى قلى يا ماما شكله فيه مشكله قومى شوفى فيه ايه .

وقفت على البابا وهى قاعده هى وكل الجارات بره وقلت لها فيه ايه قالتلى اتصلى بعبد المسيح لانه بيقولوا ان اخت جوزيف ماتت متكهربه وعبد المسيح اخذها المستشفى (احنا كلنا كا مسيحيين بنحب نسكن جنب بعض ونعرف بعض كويس من الكنيسه وجوزيف ده يبقى مع ابنى فى الفصل واخته المتنيحه اسمها هبه معاهم فى المدرسه فى اولى ثانوى) ... اتصلت بعبد المسيح قال لى فعلا يا تسونى هبه ماتت انا اخدتها ميته من البيت ... جلسنا فى حزن شديد لان هبه كانت بنت مسيحيه بمعنى الكلمه انسانه جميله النفس وبصراحه احسسنا بمراره وحزن لان هى واخيها كل ممتلكات ابوها وامها فى الحياه والموته فى حد ذاتها صعبه جدا ومفاجئة لان فى الصباح قامت امها وقالت لها اصحى يا هبه انا نظفة البيت وعملت الغذاء قومى ذاكرى شويه لان امتحاناتهم كانت هتبتدى يوم الاحد الموافق 9/5/2010 قالت لها (حاضر ياماما بس انتى خلى بالك من نفسك وانتى بتعدى الطريق ومتمشيش بسرعه) ... وقامت هبه بعد خروج ولدتها الى العمل بعمل نظافه للبيت ثانى ولكن وهى بتنظف مسكت سلك فى ايدها وخرطوم المياه فى الايد التانى وطبعاً الباقى انتم عارفينه وصرخة صرخه كبيره وجرى جوزيف عليها وحاول يمسكها ولما اتكهرب جرى على الجيران وهو فى حالة هستيريا من اطلاق الصراخات .

فيه حاجات حصلت كتير :ـ
1ـ ان جوزيف لما حاول ينقذ اخته كانت المياه ماليه المطبخ ولسه ماسكه فى الكهربا وهو مش لابس شوز فى رجله يعنى تخيلوا المنظر لو ربنا مرحمش الاسره دى كان جوزيف كمان راح فيها .
2ـ لما جوزيف فتح بابا البيت وخرج يستنجد بالجيران اتقفل الباب الحديد بتاع البيت لو مكنش الباب اتقفل كان اول جاره دخلت وشايله ابنها وحامل كانت راحت فيها هى وكل اللى كان هيدخل بسرعه علشان ينقذ الموجودين ولكن لان مراحم المسيح كبيره مسمحش ان الكارثه تكبر اكتر من كده .

المهم قام الجيران بادخال طفل صغير من الشباك وفتح الباب وفصلوا الكهرباء واخرجوا هبه لكن الموضوع كان منتهى .

وكنا كلنا شيلين هم ابوها وامها ولن احكى لكم على المشاعر والاحزان التى مر بها الاب والام فى اليوم الاول والثانى الى موعد الصلاه فى الكنيسه وعند دخولها الكنيسه اتهزت الكنيسه من الحزن كبيرها وصغيرها رجال ونساء وصار البكاء فى كل مكان فى الكنيسه واثناء الصلاه :

اخذ ابونا هيمانوت فى رش الصندوق بالحنوط طول فترة الصلاه ودى اول مره تحصل واول مره نشوفها فى الموت ... وفى الوعظه قال هذه عروس السماء والسيد المسيح اختارها وهى فى احسن استعداد لان هبه يوم الجمعه اتناولت ويوم الاربعاء سافرت الى السماء وهى صايمه لانها كانت عاوزه تحضر القداس وتتناول يوم الاربعاء وقال يا بختها عقبالنا كلنا لما نسافر زيها مستعدين وهى دلوقتى مع مارى جرجس ومارى مرقص والبابا كيرلس وكل القديسين وطلب منها انها تذكرنا امام عرش النعمه وتصلى من اجلنا وبعد الوعظه خرجنا والعزاء يملا القلوب .

وذهب الاب والام الى الكنيسه يوم السبت لحضور عيد مارى مرقص واخذوا بركة القداس وامبارح يوم الاحد كمان وحضروا معجزه فى الكنيسه وهى شفاء الابن فؤاد وكانت الفرحه بتملئ القلوب واول ناس راحوا باركوا لام الطفل وابوه .

ولما انا ذهبت الى منزل الطفل فؤاد للمباركه علشان كان فيه تمجيد للبابا كيرلس ومارى مرقس لقيت الام تبتسم ابتسامة السلام وكان ولدها واخيها الصغير ايضا موجود وبعد التمجيد قاموا بتوزيع المشروبات وبعض الحلوى وهى جلست معنا وتكلمت وضحكت وقلت لها يا بختك ليكى شفيعه فى السماء يا بختك لان ربنا طمنك على مكان بنتك واخذها عروس بلا عيب .

وانا روحت البيت فرحانه ومتعزيه لانى شفتها بتضحك مش هتصدقوا فرحتى قد ايه ان ربنا عاطى الاسره كلها عزاء بلا حدود .

شفتوا انها معجزة تعزيه وان ربنا رحيم ولما بيدى صليب بيعطى معه الاحتمال وكل شعب الكنيسه لم يترك الاسره لان فعلا ان الكنيسه جسد واحد اذا تألم عضو فيها تتألم كلها واذا فرح عضو فيها فرحت كلها .

انا اسفه انى طولت عليكم بس حسيت انى لازم اكتب الموضوع ده علشان اى حد فينا فى ضيقه يحس بالتعزيه اللى ربنا بيعطيها لينا .

شفاعة القديسين تكون معنا صلوا من اجلى